Blágrænar ofanvatnslausnir
Með blágrænum ofanvatnslausnum nýtum við leiðir náttúrunnar við meðferð vatns innan byggðar
Alta hefur verið leiðandi í innleiðingu blágrænna ofanvatnslausna (e. SUDS Sustainable Drainage Systems) hérlendis. Þær eru umhverfisvænni leið til að meðhöndla vatn innan byggðar. Við leiðbeinum við mótun, skipulag og útfærslu blágrænna ofanvatnslausna.
Hröð þróun
Blágrænar ofanvatnslausnir ryðja sér nú hratt til rúms í nágrannalöndum okkar sem einfaldari og ódýrari lausnir við meðferð ofanvatns. Innleiðing þeirra er einnig lykilatriði sem viðbragð við loftslagsbreytingum, bæði til að auka getu byggðar til að takast á við meiri öfgar í veðurfari og jafnframt að minnka umhverfisáhrif hennar.
Reynslan hefur sýnt að blágrænar ofanvatnslausnir auka viðnámsþrótt hins byggða umhverfis gegn aukinni úrkomu sem fylgir loftslagsbreytingum, bæta umhverfisgæði og geta haft minni kostnað í för með sér en hefðbundnar regnvatnslagnir.
Frumkvöðlastarf á Íslandi
Alta hefur verið leiðandi í innleiðingu blágænna ofanvatnslausna hérlendis. Alta kom m.a. að skipulagi Urriðholts sem er fyrsta hverfið á Íslandi þar sem blágrænum ofanvatnslausnum er beitt.
Alta hefur útbúið leiðbeiningabækling um blágrænar regnvatnslausnir sem einkum er ætlaður íbúum og sveitarstjórnarfólki sem vill kynna sér kosti þeirra. Auk þess unnum við vef og leiðbeiningar um blágrænar ofanvatnslausnir með Reykjavíkurborg og Veitum.
