Málþing um blágrænar lausnir
- 2012-04-26
Á málþinginu fjölluðu þau Sveinn Þórólfsson prófessor hjá NTNU, um sjálfbært vatnafar í nútíð og framtíð, Hrund Ólöf Andradóttir dósent í HÍ sagði frá framtíðarhönnuðum blágrænna lausna og Halldóra Hreggviðsdóttir ráðgjafi hjá Alta sagði frá innleiðingu sjálfbærs vatnafars eða blágrænna lausna í Urriðaholti í Garðabæ. Gunnar Einarsson bæjarstjóri í Garðabæ var málþingsstjóri. Sjá nánar um málþingið hér.
Ráðstefna um blágrænar lausnir
- 2012-04-17
Ráðstefna um sjálfbært vatnafar í byggðu umhverfi, hér einnig nefndar „blágrænar lausnir“ (vatn og gróður) „Urban Flooding – Linving with Water“ var haldin á vegum „Föreningen Vattens Södra Regionkommitté og Peter Stahres Stipendium“ , 14. - 15. mars 2012, í Malmö, Svíþjóð.
Ráðstefnan var haldin til minningar um Peter Stahres, sem starfaði sem bæjarverkfræðingur hjá Malmö borg um 30 ára skeið, en dó langt fyrir aldur fram á síðasta ári. Peter leiddi þróun í Malmö þar sem farnar voru nýjar leiðir við meðhöndlum ofanvatns frá byggð og byggðu á því að koma upp „sjálfbæru vatnafari“ í Malmö eða svokölluðu „Sustainable Urban Drainage System“ á ensku. Litið hefur verið til Malmö sem leiðandi borgar á þessu sviði á heimsvísu, einkum vegna frumkvæðis Peter Stahres og samstarfsfólks hans. Peter Stahre kom víða við og hreyf fólk með sér með brennandi áhuga sínum, jákvæðni og trú á viðfangsefninu. Hann hafði því víðtæk áhrif á fjölmarga samferðarmenn sem þarna komu saman.
Til hamingju Grand hótel með svansvottun!
- 2012-03-30
Í dag fékk Grand hótel leyfi til að nota norræna umhverfismerkið Svaninn við hátíðlega athöfn á ársfundi Umhverfisstofnunar. Þar með lýkur árangursríkri vinnu starfsmanna Grand hótel að því að aðlaga og uppfylla kröfurnar um gott umhverfisstarf. Margskonar ávinningur hefur náðst á sviði efnamála, sorpmála og dregið er stórlega úr notkun einnota hluta fyrir gesti svo nokkuð sé nefnt. Sjá nánar umhverfisstefnu á vef Grand. (www.grand.is) Fleiri verkefni eru í bígerð sem gaman verður að fylgjast með.
Alta hefur verið Grand hóteli til ráðgjafar í einstaklega ánægjulegu samstarfi við frábært fólk.
Umslag fær Svansvottun
- 2012-03-17
Alta óskar Umslagi ehf innilega til hamingju með daginn, en í dag 16. mars afhenti Kristín Linda Árnadóttir, forstjóri Umhverfisstofnunar Umslagi leyfi til að nota norræna umhverfismerkið Svaninn fyrir prentþjónustu. Umslag hefur tekið umhverfismálin föstum tökum í gegnum tíðina, fyrst með umhverfisviðurkenningu Reykjavíkurborgar 2003 og núna síðast með því að uppfylla kröfur Svansins. Alta aðstoðaði Umslag við undirbúning vottunarinnar í einkar ánægjulegu samstarfi. Á myndinni sést þegar Sölvi Sveinbjörnsson framkvæmdastjóri Umslags tekur við Svansvottuninni úr hendi Kristínar Lindu Árnadóttur.
Samningur um svæðisgarð á Snæfellsnesi
- 2012-03-07
Þann 7. mars var skrifað undir samstarfssamning sem leggur drög að stofnun svæðisgarðs á Snæfellsnesi. Svæðisgarðurinn er eign allra Snæfellinga, en þeir aðilar sem hafa tekið að sér að leiða verkefnið og undirbúning eru sveitarfélögin fimm á Snæfellsnesi; Snæfellsbær, Stykkishólmsbær, Grundarfjarðarbær, Eyja- og Miklaholtshreppur og Helgafellssveit, og félög sem eru samnefnarar í atvinnulífi á svæðinu; Ferðamálasamtök Snæfellsness, Snæfell - félag smábátaeigenda á Snæfellsnesi, Búnaðarfélag Staðarsveitar, Búnaðarfélag Eyja- og Miklaholtshrepps og Búnaðarfélag Eyrarsveitar, ásamt SDS, Starfsmannafélagi Dala- og Snæfellsnessýslu. Áhugasamir aðilar um velferð Snæfellsness eru velkomnir í hópinn.
Svæðisgarður er samstarfsvettvangur þar sem byggt er á sérstöðu svæðis og hún nýtt á markvissan hátt til verðmætasköpunar. Svæðisgarður verður einungis til fyrir samstillt átak heimamanna og starf hans er á forsendum þeirra, með hagsmuni íbúa í nútíð og framtíð að leiðarljósi. Markmiðið er að íbúarnir greini og þekki betur þau tækifæri sem felast í nærtækum gæðum svæðisins og stilli saman strengi um nýtingu þeirra. Þá verður einnig auðveldara að miðla tækifærunum til íbúa, viðskiptavina og gesta.
Alta annast verkefnisstjórn og ýmsa ráðgjöf varðandi mótun svæðisgarðsins. Sjá nánar á http://svaedisgardur.is.
Hér er stutt myndband sem lýsir þessum skemmtilega áfanga.